|
Отправлено: 21.05.05 20:31. Заголовок: Re:
Святославъ посади Ярополка в КиевЂ, а Олга въ ДревлянЂхъ. В се же время приидоша людие новгородстЂи просяще князя себЂ:«аще не поидет к нам, то мы налЂземъ собЂ князя». Рече к нимъ Святославъ:«да аще бы кто шелъ к вамъ». И отопрЂся Ярополкъ и Олегъ. И рече Добрыня к новгородцемъ:«просите Володимира»; бЂ бо Владимерь от Малуши, ключницЂ ОлзинЂ, а Малуша бЂаше сестра ДобрынЂ, отець же бЂ има Малко Любцанинъ; и бЂ Добрыня уи Володимеру. И рЂша новгородци Святославу:«даи ны Володимера». Он же рече:«тъи вы есть». И пояша новгородци Володимира к собЂ; и поиде Володимеръ с Добрынею, уемъ своим, к Новуграду, а Святославъ къ Переяславцю. Прииде Святославъ къ Переяславцю, и затворишася Болгаре въ градЂ. ИзлЂзоша Болгаре на сЂчю противу Святославу, и бысть сЂча велика, и одолЂша Болгаре. И рече Святославъ воемъ своимъ:«уже намъ здЂ пасти; потягнемъ мужескы, о братье и дружино». И к вечеру одолЂ Святославъ, и взя град копиемъ, и рче: »се град мои». И посла ко Грекомъ, глаголя имъ сице:«хощю на вас ити и взяти град вашь, якоже и сему створихомъ». И рЂша ему ГрЂци:«мы недужи противу вамъ стояти, нь возми дань на нас и на дружину свою; и повЂжьте ны, колико есть васъ, да въдамь по числу на главы». И се рЂша ГрЂци, льстящеся под Русью, суть бо ГрЂци льстиви и до сего дне. И рече Святославъ:«есть нас тысяць»; толико же приложи еще к тому тысящь. И пристроиша ГрецЂ тысящь на Святослава, и не даша дани. И поиде Святославъ на ГрЂкы, и изидоша противу Руси. ВидЂвъши же Русь, убояшася зЂло множества вои; и рече имъ Святославъ:«уже намъ нЂкамо ся дЂти, волею и неволею стати противу; да не посрамимъ землЂ Рускыя, но ляжемъ костью ту: мертвии бо срама не имут; аще ли побЂгнемъ, то срамъ имамъ, и не имамъ убЂжати, нь станемъ крЂпко, азъ же предъ вами поиду; аще моя глава ляжеть, то промыслите о собЂ». И рЂша воини:«гдЂ, княже, глава твоя, ту и главы наша сложимъ». Исполчишася Русь, тако же и ГрЂци противу исполчишася; и сразистася обои полъци, и оступиша Русь, и бысть сЂча велика зЂло; и одолЂ Святославъ, и бЂжаша ГрецЂ. А Святославъ пакы поиде къ граду, воюя и грады разбивая, иже стоять пусты и до днешняго дне. Цесарь же созваше боляры своя в полату и рече имъ:«что сътворимъ, яко не можемъ противу ему стати». И рЂша ему бояре:«пошли к нему дары, искусимъ его: любезнивъ ли есть злату и паволокамъ». Послаша к нему злато и паволокы и мужа мудра, и рЂша ему:«глядаи взора его и лица его и смысла его». Он же, вземъ дары, иде къ Святославу. И повЂдаша Святославу, яко приидоша ГрЂци с поклономъ. И рче Святославъ:«введите их сЂмо»; и абие приведоша и. ОнЂмъ же слом пришедшимъ и пакы поклонившимся ему, и положиша пред нимъ злато и паволокы. И рече Святославъ, кромЂ зря, отрокомъ своимъ:«возмЂте, кому что будет». Они же поимаша; а слы цесаревЂ, видЂвши тое, приидоша ко цесарю. И съзва царь бояры своя и велможа; рЂша же послании, яко»приидохомъ к нему, и не позри на ны, нь толико отрокомъ повелЂ поимати». Рече же единъ от ту предстоящих:«царю, искуси единою еще; пошли к нему оружье браньное». Онъ же послуша его, и послаше ему мечь и иное оружье. Слу же цесареву принесъшю къ Святославу, он же приимъ, нача любити и хвалити и цЂловати, [яко самого] цесаря. И приидоша опять къ цесарю, и повЂдаша вся бывшая. И рЂша бояре:"лютъ сьи мужь хощеть быти, яко имЂниа небрежеть, а оружие емлет и любит; имЂся по дань». И посла цесарь, глаголя сице:«не ходи ко граду и возми на нас дань, еже хощеши»; мало же бЂ не дошелъ Цесаряграда. И даша ему дань; он же и на убиеныя имаше, глаголя, яко»род его возметь». И взя же дары многы, и възвратися къ Переяславцю съ похвалою великою. ВидЂв же мало дружинЂ своея, и рече к собЂ: »да како прельстивше, избиють дружину мою и мене»; бЂша Е бо мнозЂ избиенЂ на полку. И рече:«поиду в Русь и приведу болши дружинЂ»; и поиде в лодьяхъ. Рече же ему воевода отень СвЂнделдъ:«поиде, княже, около на конЂх; стоять бо ПеченЂзЂ в порозЂхъ». И не послуша его, нь поидоша в лодьяхъ. Послаша переяславци къ ПеченЂгомъ, глаголюще сице:«идеть вы Святославъ в Русь, вземъ имЂние много у ГрЂкъ и полонъ бещисленыи, с маломъ дружины». Слышавши же ПеченЂзЂ, и заступиша ПеченЂзи порокы. И прииде Святославъ к порогомъ, и не бЂ лзЂ проити; и ста зимовати в БЂлобережьи; и бЂ гладъ великъ, по полугривнЂ голова конячья. ВеснЂ же приспЂвши. Поиде Святославъ в порогы, и нападе Куря, князь ПеченЂжьскыи и убиша Святослава, и взяша главу его, и во лбЂ его сдЂлаша чашю и пиаху изъ неи.
|